فارسلارين عوثمانلي سيندرومو

I

         بيزيم قورتولوشوموز سؤز کونوسو ايسه، بو، هئچ بير زامان و هئچ بير شکيلده تورکييه سيز اولماياجاقدير. تورکييه سيز اولماياجاقسا، او زامان تورکييه ني دريندن اؤيرنمه ميز گره کير. تورکييه، اؤزلليکله گونئي آذربايجاندا و ايراندا ياشايان تورکلر اوچون قورتولوش شانسيدير. بو شانسي قوللانمانين تک يولو دا تورکييه ني دوغروجا اؤيرنمکدير. هانسي تورکييه ني؟ مالازگيرد ساواشيندان باشلاييب عوثمانليني ايچرن و مودئرن تورکييه جومهورييتينه قدر داوام ائدن تورکييه. بيز عوثمانليني دا بيلمک زورونداييق. عوثمانليني بيلمک هر بير تورکچو اوچون بير تکليفدير. اولمازسا اولماز. عوثمانليني اؤيرنمه سورجينده قبول ائديب-ائتمه يه جگيميز بير سورو اولقولارلا راستلانا بيلريک. بو اؤنملي دئييل، اؤنملي اولان بو تاريخي بيلمکدير، اؤيرنمکدير. چونکو بو تاريخين ايچينده بيز ايستانبولو تورک يوردو ياپديق. بير تک ايستانبولون فتحي عوثمانليني اؤيرنمک اوچون يئترليدير. عوثمانليني اؤيره نيب و اونو ديالئکتيک تفککوروموزون بير کونوسو ياپماق هم ذؤوقلودور، هم ده تاريخ بيلينجيميزين، بيلگيميزين درينلشمه سينه سبب اولور. چونکو عوثمانليني دوشونجه باغلاميندا اله آلديغيميزدا ايستر-ايسته مز فرقلي آچيلاردان دَيَرلنديره جه یيک. چليشکيلرين چيلغين بولدلار کيمي بير-بيرينه گيرمه سي بئينيميزده ايلديريملار کيمي چاخاجاق، بير چوخ ذهني قارانليقلاريميز آيدينلاناجاقدير. عوثمانلي 600 ايلليک بير تاريخدير. کيچيک بير حاديثه  دئييلدير. بو قدر اوزون بير تاريخ اوزرينه بيليمسل و سوسيولوژيک آختاريش ياپماق بير عؤمره يئتمز. چونکو عوثمانلي تاريخي نين ياني سيرا هم ده عوثمانلي ايمپئراتورلوغونون ايليشکيده اولدوغو دونيا دؤولتلري نين ده مدنييتيني اؤيرنمک زوروندا قالاجاييق. عوثمانلي تاريخي اوزرينه بير سورو کيتاب اوخوسام دا، ويلل دورانت´ين 11 جيلدليک «مدنييت تاريخي» کيتابي نين عوثمانلي بؤلومو منيم اوچون چوخ اؤيرتيجي اولدو. عوثمانليني اينانيشيميزين ياتاغي کيمي دئييل، تاريخ بيلگيميزين قايناغي کيمي اؤيرنديگيميزده اونون اوزَرينه تورلو گؤروشلري ده خوشگؤرو ايله قارشيلاياجاغيق. آنجاق عوثمانليني ايدئاليزه ائدن، يا دا اينکار ائدنلر هئچ بير زامان بو اوزون تاريخ اوزَرينه بيليمسل بيلگي ائتمک ايسته مزلر، هر ايکي طرف بيرئيسل اينانجلارينا دايانار. بيري کؤتولر، بيري سئور. عوثمانلي واز کئچيلمز بير اولقو اولاراق دايما ذئهنيميزين، دوشونجه ميزين اؤنونده دوراجاقدير. بيلگي آرتيشي بللي بير تاريخي دريندن اؤيرنمه يه يارديمچي اولماقدادير. بو اوزدن ده ايستر آنادولو تورکلوگو اولسون، ايستر آنادولو ديشيندا ياشايان تورکلوک آچيسيندان عوثمانلي تاريخي اؤزگووَن و اؤيره نيم آچيسيندان ديقتلريميزي چکه جکدير. ايراندا ياشاديغيم موددت عرضينده تاريخ اوزَرينه يازيلان و يا ترجومه ائديلن کيتابلاردا عوثمانليني هپ کؤتوله ديلر. عوثمانليدان قورخونج، چيرکين، آدام يئين صورت تقديم ائديرلر اوخوجولارا فارس تاريخچيلر. بو دوغرولتودا سولچو و ساغچي تاريخچيلر نظر بيرليگي ايچينده ديرلر. ايران توده کوممونيست پارتيسي نين ايدئولوقو اولان احسان طبري نين عوثمانلي تاريخي اوزرينه يازديغي گؤروشلرله ايسلامچيلارين يازديقلاري گؤروش اؤرتوشمکده دير.  

II

         تورکلري آشاغيلاماق فارسلار اوچون بير اَه يلنجه يه دؤنوشموشدور. فيردووسي نين «شاهنامه»سيندن باشلايان بير سورجدير بو. شاهنامه ده فارس قيزي نين تورکله ائولنمه سي ياساقلانير. آنا طرفيندن تورک، آتا طرفيندن روستمين (فارسين) اوغلو اولدوغونو بيلمه ين سوهرابلا ساواشير کئيکاووس شاهين قيزي قوردافريد. ساواشدا يئنيلير. سوهراب فارس قيزي قوردافريده عاشيق اولور و

اونا ائولنمک تکليف ائدير. قوردافريد سوهرابين بو تکليفينه گولوب  «تورکله فارس قيزي ائولنمز»* - دئيير. فارس ادبيياتيندا عيرقچيليگين تمليني قويان فيردووسي باشقا قؤوملرله ائولنمگي فارس کيمليگينین و اؤزگونلوگونون پوزلوشو کيمي تقديم ائدير. عربله، تورکله ائولنمه لرين ضرري حاقدا يازير و «ايرانلي ايله ائولنن تورک و عربدن اؤيله بير نسل اورتايا چيخار کي، اونلارين عمللرينه اينانماق اولماز.»**- يازير.  فيردووسي بونونلا دا يئتينمه يير و داها ايره ليلره گئديب تورک سويونون تاريخدن سيلينمه سي اوچون موباريزه نين بير ميسسيون اولدوغونو ساوونور.  «تورک سويوندان کونوشما، تورکون تاريخده ايزي قالماماليدير، سويو کسيلمه ليدير.»***- دئيير. بونون دا سببيني تورکون عاغلينين اولماماسيندا گؤرور.  «تورک» اولاراق نيته له نن عاغيلسيز اينسانا بنزر ياراتيق ضررلي اولدوغو اوچون سويو کسيلمه ليدير و «تورک اولان کيمسه ده بولونماز ذکا — کندي ذکاسيندان بولسون بير صفا»****- دئيير.  

         ايشته بو شکيلده شعرله ائستئتيزه ائديلميش بير تورک دوشمنليگي فارسلارين شعورونا و شعورالتينا يئرلشديريلميشدير. اونلارين تاريخ باخيشلاري «شاهنامه» اکسنلي (محورلی) اولدوغو اوچون تورک اولوسو ايله ايلگيلي اولاراق بير اؤنيارقيلاري، اؤنسئزيلري وار. شاهنامه قايناقلي اؤنيارقي. بو اؤنيارقايلارينا داياناراق فارس ضياليلاري بير سورو رومان يازميش و اورادا تورکلري قورخونج ياراتيق کيمي گؤسترميشلر. بو وسيله ايله ايراندا ياشايان تورکلرده تاريخ بيلگيسي بوشلوغو اولوشدورموش و سونرا دا بو بوشلوغا کندي تاريخ ايدئولوژيلري ايله دولدورموشلار. فارسلار اوچون تاريخ بيليم دئييلدير، بير ايدئولوژيدير. فارسلارين تورکلره قارشي ساواش ايدئولوژيسيدير. بو ايشده چوخ دا باشاريلي اولموشلار. چونکو آوام توپلوم، کوتله گونده ليک حياتلا، گونده ليک ائييتيم دوزئيي ايله يئتينَر. ايرانداکي تورک کوتله سي دؤولتین بؤيوک ايمکانلاريني و پروپاقاندا اولاناقلاريني الينده توتان فارس عيرقچيلري نين تبليغاتلارينا يئنيک دوشموشلر. سئچکينلر فارسلارين بو توتوملارينا قارشي چيخسالار دا اللرينده هئچ بير کوتله ايله تيشيم آراجلاري يوخدور. بو اوزدن ده ايران موحيطينده تورکلر حيزلي بير شکيلده ميللي کيمليک آچيسيندان سويسوزلاشماقداديرلار. ايشين ايلگينج ياني تورک تاريخي ايله ايلگيلي اوريئنتاليستلرين يازديقلاري کيتابلار دا يانليش ترجومه ائديلير. يعني بو تاريخ کيتابلارينداکي گؤروشلر دؤولتين قاورامساللاشديرديغي ذهنييتين سوزگجيندن کئچير. بو اوزدن ده ايران موحيطينده يايينلانميش کيتابلار دولاييسييلا تورک تاريخي نين گئرچکلريني آنلاماق مومکون دئييلدير. 

III

         فارس ميللتچيلري نين اوزرينده چنه يوردوقلاري تاريخ ساحه سيندن بيري ده عوثمانلي. عوثمانلي- تورک دؤولتي دونيا تاريخي نين چوخ اؤنملي اولونتولاريندان (فئنومئنلئريندن) بيريدير. عوثمانلي اوزَرينه مينلرجه آراشديرما تيپلي ياپيتلار يازيلميشدير. بوتون بو ياپيتلارين فارس ديلينه ترجومه سينده ترجومه قوراللارينا صاديق قالينماميشدير. عوثمانلي تاريخي، فارس ميلتچيلري نين قورخونج رؤياسي. ايستيثناسيز اولاراق بوتون فارس ميلتچيلري رومانلاري نين، شعرلري نين بير يئرينده عوثمانليني سؤومه دن کئچمه ميشلر. عوثمانلي دوشمنليگي فارسلار اوچون بير سيندروم حالينا گلميشدير. عوثمانلي دوشمنليگي ائتمک بير ايفتيخار ساييلير. «عوثمانلي دوشمنليگي» آدي آلتيندا

سانکي اينتئلئکتوئل دوزئيلريني سرگيله ميش اولورلار. عوثمانلي دوشمنليگيني بير سيندروم حالينا گتيرن فارسلار البتته کي، صفوي سئوگيسيني اؤومه ليديرلر. عوثمانلي آوروپادا آدام اتي يئينده صفوي اسکي ساساني و علی عدالتيني ديريلتميش! فارسلار صفوي دؤولتي نين قورولوشونو «فترت» اولاراق نيته لرلر.  «فترت» ايکي زامان آراسينداکي بوشلوق دئمکدير. فارس تاريخچيلرينه گؤره صفوي دؤولتي نين قورولوشو ايله اسکي ساساني دؤولتي يئنيدن جانلانميشدير. ساسانيلرله صفوي دؤولتي آراسينداکي 900 ايلليک زامان بوشلوغونو فترت آدلانديريرلار. اصلینده بو باخيشلاريندا تام اولاراق حاقليديرلار. چونکو شاه ايسماعيل باشينا تبريزده شاهليق تاجي قويدوغوندا 14 ياشلي بير چوجوق اولموشدور. دؤولتچيليک تجروبه سي اولمايان بير چوجوق. صفوي دؤولتي فارسلارين ايدئولوژيک و باتيليلارين تئکنيک دستگي ايله قورولموشدور.  «چالديران» ساواشينداکي شاه ايسماعيلين يئنيلگیسيني درين بير ايچ يانقيسي ايله خاطيرلارلار. «چالديران» ساواشي تورکلوگون يازقيسي آچيسيندان چوخ اؤنملي بير ساواش اولموشدور. بورادا سولطان سليمين قطعيتي، سارسيلماز ايراده سي تورک اولوسونون تاريخدن سيلينمه سيني انگلله ميشدير. چونکو ويلل دورانتين دا يازديغينا گؤره «چالديران» ساواشيندا عوثمانلي يئنيلسه ايدي، باتي ايستانبول گئري آلماغي قافاسينا تاخميشدي. ايستانبولون بو گون و ابديين تورک يوردو اولاراق تثبيت ائديلمه سي نين سببي سولطان سليمين قطعيتي اولموشدور. سولطان سليمي ايچ پوليتيکاسيندا علويلرله ايلگيلي ائلئشتيرنلر وار. ايچ پوليتيکادا خطا ياپميش اولا بيلير. آنجاق «چالديران» ساواشينداکي ظفري تقديره شاياندير. چونکو تاريخي اولايلارين سونوجو بللي اولدوقدان سونرا بن خلدونون دا يازديغينا گؤره، اونون اوزَرينده بيليمسل دارتيشمالار باشلاتماق مومکوندور. چونکو تاريخده سبب- نتيجه آراسينداکي ايلشکيلر اينجلنمه ليدير. عوثمانلي نين نتيجه سي تورکييه جومهورييتي و صفوي نين نتيجه سي ايراندير. بيري تورک دؤولتي، ديگري فارس.  

         فارس ميلتچيلري نين عوثمانلي- تورک دؤولتيني آشاغيلاماسي نين ان اؤنملي سببي ايراندا ياشايان تورکلري تاريخدن سيلمک اولموشدور. عوثمانليني تورک اولاراق سورَکلي کؤتوله ين فارس ائييتيم سيستئمي ايرانداکي تورکلرده آشاغيليق کومپلئکسي اولوشدورماقدادير. آشاغيليق کومپلئکسينه گيرميش بير ميللتي تاريخدن سيلمک چوخ کولايدير. «چالديران» ساواشيني حاقلي اولانلا (صفوي) حاقسيز اولان (عوثمانلي) موحاريبه سي کيمي تقديم ائديلیر. 1400 ايل اؤنجه علي نين حاققيني يئين ابوبکير، عؤمر و عوثمانين ذهني واريثلري عوثمانلي ايميش. بو عوثمانليلار ايلک اوچ خليفه کيمي دونيادا حاقسيزليغي حاکيم قيلميشلار. علي سويوندان اولان صفويلر بو حاقسيزليغا باش قالديرميشلار. حاقسيزليغا قارشي ساواشيندا کربلادا شهيد اولان حوسئين ده يئنيلميشدير، «چالديران» ساواشيندا شاه ايسماعيل دا. اؤنملي اولان بو يئنيلگي دئييلميش، اؤنملي اولان حاققين زئهينلرده جيلولنمه سي ايميش. بودور فارس عيرقچيلري نين عوثمانلي سيندرومو. صفويلردن سونرا قيليج گوجونه قانلي بير شکيلده شيع لشديريلن ايراندا ياشايان تورکلر ده عوثمانلي دوشمنليگيني قبول ائتمه آچيسيندان اينانج پلانيندا چوخ ياتقين اولموشلار. اولايي شيعه- سونني پلانينا چکمگي باشاران فارسلار ايران جوغرافيياسيندا ياشايان تورکلري اينانج پلانيندا عوثمانلي دوشمني ائتمگي باشارميشلار. حتّی ايرانين آتئيست ميلتچيلري ده عوثمانلي دوشمنليگينده شيعه فاناتيکلري ايله عئيني يؤنده دوشونورلر. آيريجا، بورادا سؤز کونوسو عوثمانلي دوشمنليگيني تاريخده اولوب- بيتن اولقو کيمي دوشونمه ميشلر. عوثمانلي نين معنوي و سياسي واريثي مودئرن تورکييه جومهورييتي ايسه، او زامان عوثمانلي نين تورونلاريني دا کؤتوله مک گره کير. بو دوغرولتودا «ائرمني سويقيريمي»نين ايراندا تانيتيمي اوچون ايران دؤولتي هر تورلو ايمکان ساغلاميشدير. سادجه ائرمنيلرين دئييل، فارس ميلتچيلري نين ده وحشي تورکلرين ساوونماسيز ائرمنيلري قدارجاسينا قتل عام ائتمه سي هاقدا يوزلرجه کيتاب و درگي بوراخميشلار. بونلار فارسلارين اوزون زاماندير عوثمانلييا قارشي سيستئملي شکيلده دوزنله ديکلري پروپاقاندادير.

 گونتاي گنجالپ 

بئله موباریزه اولماز

هر کس ظن ائدير کي، ميللي مسئله صيرف اينقيلابي بير ايشدير. چونکو کئچن عصرده بيزيم بويوموزو اوخشاييب آنلامسيز اينقيلابلارا، دئويرمه لره سؤوق ائده بيلميشلر. تورک ائولادلاري بوشونا اؤلدورولموشلر، فارسين تاريخي هدفلري يولوندا. سونرا دا سانکي اينقيلابچي اولماق چوخ ياخشي بير ايش ايميش کيمي، آليشميشيق بو آنلامسيز آلتوريست داورانيشلارا. اويسا بير ميلتين قورتولوشو اوزون وعده لي بير سورجدير. تصادوفن اورتايا چيخان اولايلار اونو سورعتلنديريب يا دا سورعتيني آزالدا بيلر. بيز ميلت اولاراق طبيعتيميزده کي شيددت و دئوريمجيليک دويغولاريني هله ده علمي و اينتيباهي يؤنه يؤنلنديره بيلمه ميشيک. اورتادا هئچ بير گوجلو شخصييتلر يوخدور. هر کس الينه دوشن بير فورصتده «قهرمانليق» گؤستريب 2-3 شوعارلا مشهوري- جاهان اولور. بير شوعاري نه قدر سؤيله مک اولار؟ شوعار ندير؟ شوعار بللي بير دونياگؤروشونون سيخيشديريلميش، مرکزلشميش شکليدير. او زامان ايلک اؤنجه بو دونياگؤروشونون فلسفه سيني، سوسيولوژیسینی، ديلسل درينليگيني، ادبيياتيني اولوشدورماق لازيمدير. ندنسه بو ساهه يه هئچ اؤنم وئرن يوخدور. بيزيم موباريزه سادجه سياسي دئييل. اؤزلليکله گونجل سيياستين چرچيوه سينده ايليشيب قالا بيلمز.

ميللي بير اينسانين ايراندا اونيوئرسيتئت موعليمي اولماسي چوخ اؤنملي بير فورصتدير. چونکو بو وسيله ايله ايرتيباطدا اولدوغو يوزلرجه، مينلرجه گنج آدامين بئينينه ميللي دوشونجه ني اکه بيلر. بئله بير فورصتي ياخالاييب و اونيوئرسيتئت موعليمي اولان بيري نين گليب بير ايزديحامين ايچينده 3-4 گون عؤمرو اولان قيسا سوره لي قهرمانليق گؤستريب و «تورک ديلينده مدرسه» دئمه سي نه قدر دوغرودور؟ سونرا بو آدامي توتوب ساليرلار زيندانا. 3-4 آيدان سونرا بوراخيرلار. ايشيني اليندن آليرلار. قالير ايشسيز و اوز توتور آنکارا ب م ت- نين سياسي موهاجيرلر اوفيسينه. گلير آوروپايا. آوروپادا ايسه ايقتيصادي کريز و ايشسيزليک. نه ياپاجاق آوروپادا؟ بو شکيلده بوتونويله موباريزه نين ديشينا چيخير. اويسا بير ميللي اينسانين ايراندا اونيوئرسيتئت موعليمي اولماسي بؤيوک شانسدير. ياخشي ماعاش آلير. ميلتين ان گنج نسلي ايله ايرتيباطدادير و فيکيرلريني اونلارا اينتيقال ائده بيلر. اونيوئرسيتئتده فايدالي اولما ايمکانيني آنلامسيز بير شوعارلا، 3 گونلوک قهرمانليقلا ايتيرير. بو گون موباريزه نين گئرچک سنگري ايرانداکي اونيوئرسيتئتلردير. آنجاق اينسانين نفسي ده وار. اينسانين مشهور اولما آرزولاري دا اولدوغو اوچون عقلي درينليگی اولان يولو سئچمک دويغوسال تورک اينساني اوچون بير آز چتين اولور. تاریخده عاقلین دا یئرینه قیلینج قوللانان تورک اوچون. هامي سيياستله مشغول اولسا، او زامان ميللي حرکتين دوشونجه سيني کيملر اولوشدوراجاق. ندن در. جاواد هئيت اؤرنگينه ديقت ائديلمير، عجبا؟

گونتاي گنجالپ