سئویرم تورکییه نی-  گونتای گنجالپ 

  ایلک زامانلار منه جنّت کیمی اولموشدو موغان 

  کؤنلومون قیبلگاهی، زیروه لی چالباش ساوالان 

  اردبیل، نازلیجا شهریم منیم، ائی نقشی- جاهان 

           قلبیمین لؤوحه سینه حک ائله دیم اورمییه نی 

           اولو بیر سئوگییه دوشدوم، سئویرم تورکییه نی 

  گنجه دن شیروانا کئچ، ایغدیرا وار، تبریزه گل 

  واریبان گؤیچایا بول نار ییغاراق گل، بیزه گل 

  بیرجه گون زنگانا اوغرا، باکیدان سولدوزا گل 

           گؤزه لیم عشق اودو آرتیق تالاییب یاخدی تنی 

           من ناسیل ال چکر اوللام؟ سئویرم تورکییه نی. 

  کرکوکون حالینی سورسان، شکیدن دوش یولا گل 

  قوشاچای نازلیجاسییلا توتوبان قول- قولا گل 

  کئچه رک مارمارادان، دوغروجا ایستانبولا گل 

           اوردا اویغور گؤزه لی کندینه جلب ائتسه سنی. 

           سئو اونو، آما کی، بیل، من سئویرم تورکییه نی. 

  سن سمرقندی سئورسن، اورا چوخ سئومه لیدیر 

  کیریمین باغلاری جنّتدی و چوخ گؤرمه لیدیر 

  قیرقیزیستان قیزی نین گؤزلری ده سورمه لیدیر 

           بیر چوواش نازلیجاسین سئومه یه قاندیرما منی! 

           منیم عشقیم وار عزیزیم، سئویرم تورکییه نی