ايرانداکي اولايلار و بيزيم ميللي کيمليک سورونوموز

سوال: ايراندا باش وئرن اولايلاري سئچيم اؤنجه سي و سئچيم سونراسي

 اولاراق نئجه دَيَرلنديرمک مومکوندور؟

جاواب: سئچيم اؤنجه سينده ايقتيدارين ايراده سي ديشيندا اولان عاميللردن آسيلي اولاراق بير بوشلوق اورتايا چيخميشدي. بو فورصتدن يارارلانيب بعضي کوچه گؤستريلري دوزنله مک چوخ ياخشي ايدي. اؤزلليکله اکبر اعلمي نين سؤيلملري بيزيم ايران گئنلينده ميللي کيمليگيميزين ديله گتيريلمه سي اوچون داها موناسيب ايدي. ايراندا ياشان تجروبه لي ميللي اينسانلار دا بو فورصتدن ايستيفاده ائتمگي باشارديلار. داها سونرا خاتمييه عآيد اولان بير کليپ يايينلاندي. اوردا اردبيللي بير مرثيه خوانين ديلي ايله بير گولدورو دئميشدي. بو گولدورولره ائديلن اعتيراضلار سانکی بیر آز آشیری اولدو. منه ائله گلدي کي، سانکي بعضي آداملار جانلاريندان بئزميشلر. حياتلاريني چوخ اوجوز ساتماغا حاضيرديلار. بعضي ميللي تشکيلاتلار و شخصلر ده احمدينژادين بو اويونونا گلديلر. همين ميللي تشکيلاتلار و يا همين ميللي آداملار بو گون ده دئييرلر کي، گئدين خاتمي نين طرفدارلاري نين يانيندا اؤلون. اينسانلارين حياتينا چوخ اوجوز باخيرلار. خاتمي نين دئديگي او جوک ائله ده قورخولو بير شئي دئييلدي. احمدينژاد جبهه سي بيزيم اينسانلاريميزي اويونا گتيردي. صيرف او جوکا اعتيراض اولاراق بو گون بعضي گنج آداملار زيندانداديرلار. اويسا صفوييتين اساسي اردبيلده آتيلميشدير. صفويلر زامانيندا ايسلام اوزَرينه يازيلان کيتابلاردا، مرثيه لرده علي، حوسئين و ديگر ايماملار آدم پئيقمبرين زامانينا قدر آپاريلير. بونلار بيزيم اينانج شکليميز. يعني صفوييتين گتيرديکلري. ميللي حرکت دئمک، هم ده ميلتين اؤز جهالتي ايله ده قارشي- قارشييا گلمه سي دئمکدير. اؤنملي اولان اودور کي، ميلت اولاراق جاهيل اولماياسان. جاهيل اولدويسان سني مسخره ائده جک بیریلری تاپيلار. خاتمي اولماز، مثلن ميرزه جليل اولار، يا دا صابير و بير باشقاسي. الیمیزده دینی جهالتیمیزله باغلی «ملا نصرالدین» درگیسی کیمی سندیمیز وار. ايستميرم خاتميني ميرزه جليلله قيياسلايام. صابیر توپلومو ائییتمک اوچون اونون چیرکین کولتورونو ایفشا ائدیردی، خاتمی ایسه آشاغیلاماق اوچون. دئمک ايسته ديگيم بودور کي، صفوييت کولتورونده چوخ مسخره شئيلر وار. خاتمينی یئتیشدیرن ده همین کولتوردو. خاتمييه او شکيلده داورانان بو گون اونون يانيندا توپلومو خيابانلارا سسله يير! آنجاق اعلمي نين تبليغاتلاري سيراسيندا ياخشي حاديثه لر اولدو. سئچيم بيتدي و سئچيمه حيله قاتيلديغي اورتايا چيخدي. سئچيم سونراسي اولايلار داها فرقلي گليشدي. سئچيم سونراسينداکي اولايلارا تورک ميللي کيمليگيني اساس آلان جبهه داخيلده هاقلي اولاراق سسسيز قالدي. چونکو سئچيم سونراسي اولايلار ايقتيدار ساواشيندان باشقا هئچ بير شئي دئييلدير و بيزي اصلا ايلگيلنديرممه ليدير. بيزي ايلگيلنديره جک اولان طرفي بودور کي، اونلار بير- بيرلريني ضعیفله ديرلر. بو، دولاييسييلا بيزيم ياراريميزادير. موسوي يانداشلاري اولاراق خاريجده BBC تی وی-ده و ديگر يئرلرده موصاحيبه وئرنلر تانينميش شووينيست آداملارديلار. تورک دوشمنليگي ايله غورور دويان شخصلرديلر. اونلار دا ميلتي عوصيانا چاغيرديلار، بيزيمکيلر ده!

سوال: بيزيم جبهه ميزدن حاديثه يه باخانلار بئله حساب ائديرلر کي، بو بير دئموکراتييا ساواشيدير. بو اوزدن بيز ده قاتيلمالييميشيق

جاواب: اؤنجه بونو بللي ائتمک لازيمدير کي، اونلار گئرچکدن ده بيزيم جبهه دنمي باخميشلار؟ بيزيم جبهه دئمک، 4-5 شوعاري ازبرله ييب اونون اساسيندا دانيشماقمي؟ اؤنجه بو «بيزيم جبهه» آنلاييشيني تانيملاماق لازيمدير. مثلن شريعتمداري نين اوغلونون هيجانيني آنلاتماق، شريعتمداري نين اينتيقاميني 30 ايلدن سونرا آلماغا چاغيرماق بيزيم جبهه نين سؤيلميديرمي؟ دئييلدير، قطعيين دئييلدير. شريعتمداري نين آذربايجان- تورک ميللي مسئله سي ايله نه او زامان بير ايلگيسي اولموشدور، نه ده ايندي. شريعتمداري سون نفه سينه قدر حيسسن، ذهنن و روحن فارس کيمليگي نين تمثيلچيسي اولدو. کرد دین عالیمی عزالدین حسینی نقدر اونا آدربایجان مسئله سینی آنلاتماق ایسته سه ده باشارمادی. آدامین روحوندان تورکلوک دویغوسو تامامن سیلینمیشدی. اونو ندن زورلا اورتاليغا ميللي تاريخ کيمي سوخماق ايسته ييرلر؟ آيريجا، ايراندا باش وئرن حاديثه لرين آرخاسيندا دوران شخصلره باخماق لازيمدير. رفسنجاني و احمدينژاد عئيني شخص دئييللرمي بيزيم آچيميزدان؟ ايندي نئجه اولا بيلر بيز رفسنجاني جبهه سينده دوروب دئموکراسی اوغروندا ساواشاليم؟ رفسنجاني ذهنييتي بيزيم کيمليگيميزي رسمييته تانييارمي؟ تورکلرين ده بو گؤستريلره قاتيليب اؤزلريني اؤلومه وئرمه لرينه آچیق اولانلار ميللي مسئله نين درينليگيني آنلاميش دئييللر. بيزيم توپلوموموز سانيلديغي قدر ده حاضير دئييل. بو رئژيم ده بو کيمي اعتيراضلارلا دئوريلمز. آنجاق بو رئژيمي ايچينده کي دنگه سيزليکلر دئويره جک. هوببئسين گؤزل بير تثبيتي وار بو قونودا. « گوج موطلقلشنده اؤزونه زيان وئريب، اؤزونو اورتادان قالديرار.» گوجون هم قوروجو، هم ده ييخيجي اؤزلليگي وار. اينقيلابدان سونراکي بوتون اينقيلابي و قوروجو سؤيلملر آرتيق تاريخه گؤمولموش. ايندي بو موطلق گوجو الينده بولوندوران رئژيم اؤزونه ضرر وئره جک. سون اولايلار دا موطلق گوجون اؤزونه يؤنلميشليگي نين گؤسترگه سي اولدو. ايقتيداردا دنگه سيزليک وار و بو دنگه سيزليک رئژيمی ييخاجاق. يعني رئژيمين ييخيليشيندا عاميللردن بيري ده بو اولاجاق. خاريجي دونيادان گلن دئموکراسی اسينتيلري، داخيلده ميللتلرين آزاد ياشاما ايستکلري بو رئژيمين ييخيلماسيني سورعتلنديره جک. اؤرنگين 3 ايل اؤنجه آذربايجان شهرلرينده کي حاديثه چوخ اؤنملي مئساژلار وئردي تاريخه. بو گونکو سئچيم سونراسي حاديثه لر ده او شکيلده. بو اوزدن ده تورک ميللي کيمليگيني اؤز سياسي و دوشونسل حياتيندا اساس آلان اينسانين هدفينده رئژيمي دئويرمه کيمي بير ايستک اولماماليدير. بونو تاريخ کنديليگيندن ياپاجاق. کنديليگيندن اولاجاق بير حاديثه يه بيزلر ائنئرژي صرف ائتمه مه لي یيک.

سوال: ايرانداکي گؤستريلرده آذربايجان شهرلري سوسقون قالدي. بعضي اينسانلار بئله حساب ائديرلر کي، تئهراندا ياشايان زنگانليلار، تبريزليلر، اردبيلليلر و ديگرلري اؤز پلاکاردلاري ايله تظاهوراتلارا قاتيلماليديرلار. بو نه درجه ده دوغرودور؟

جاواب: آذربايجان و تورک شهرلري نين بو حاديثه لرده سوسماسي چوخ ياخشي اولدو. بو، اونو گؤستردي کي، آذربايجان آرتيق دوشونوب داورانماغا قرار وئرميشدير. مشروطه کيمي ماجرالارا قاتيلماق ايستمير. بو باخيمدان آذربايجانين سوسماسي چوخ دَيَرليدير. بو آرادا بونو دا بللي ائتمک لازيمدير کي، تبريز مرکزلي مشروطه حرکتي نين بو گونکو ميللي حرکتله هئچ بير علاقه سي يوخدور. مشروطه مودئرن فارس ميلليويتچيليگي اساسيندا اورتايا چيخدي. مشروطه دن بير تک يارپاق تورکچه بير اثر ميراث قالمادي. ستتارخان بير ساواشچي ايدي. دوشونجه آدامي دئييلدي. تورک کيمليگي مشروطه نين آماجي اولماديغي اوچون، ستتارخان دا فارس کيمليگي يولوندا ساواشديريلدي. آنجاق بو گونکو ميللي حرکتده تورکچه يازيلان اثرلري، مقاله لري بير يئره ييغسانيز مينلرجه جيلد کيتاب ائدر. بیر نئچه رومان يازيلميش. او اينسانلار کي، دئييرلر ستتارخان گئتدي تئهراندا اؤلدو و گئتمه مه لي ايدي، بونلار دا خطا ائديرلر. گويا تبريزده قالسايدي نه ائده جکدي کي؟ چونکو ستتارخانين زامانيندا ميللي ذهنييت يوخ ايدي، اصلا يوخ ايدي. ستتارخانين دا ائله بير ايستگي يوخ ايدي. چونکو او زامان ايقتيداردا اولان تورک قاجار دؤولتي ايدي و مودئرن فارس ميللييتچيليگي قاجارلاري دئويريب فارس کيمليگي محورلي ميللي دؤولت قورماق ايسته ييردي. بيزيم جهالتيميز اوزرينه، قهرمانلاريميزين فارس هدفلري يولوندا ساواشمالاري اوزرينه فارسلار بونو باشارديلار. اليميزده اولان دؤولتي قاپديرديق. ايندي اوتوروب ساختا تاريخ دوزلديب بو حرکتين درينليگيني 100 ايل اؤنجه يه آپارماقلا بير يئرلره واريلماز. بو حرکت يئني بير جرياندير. تام يئنيدير. چونکو داها اؤنجه آلتئرناتيويني تاريخيميزده گؤرمه ميشيک. پيشه وري ايله ده بير علاقه سي يوخدور. پيشه وري ده تصادوفلرين دوغوردوغو بير حاديثه ايدي، گلدي و ساوجيبولاغي ساتدي کوردلره. بير تاريخي حاديثه نتيجه سيني وئرميشسه، اونو اينجله مک آساندير. چونکو تاريخ سادجه اولايلارين آخيشي دئييلدير. تاريخي اولايلارين بير نتيجه سي اولماليدير. او نتيجه يه چاتديقدان سونرا سبب- نتيجه ديالئکتيکاسيندان يولا چيخاراق اونو دَيَرلنديرمک آسان اولور. مشروطه نين نتيجه سي پهلويلر اولدو. ايندي بعضيلري دئيير کي، پهلويلرين مئيدانا چيخيشيندا اينگيلتره نين رولو اولدو. بونلار تفرروعات. اينگيلتره ده او زامان گؤردو کي، مودئرن فارس ميلليتيتچيليگي ايراندا چوخ گليشيب، مشروطه نين بوتون قايناقلاري فارس ميللييتچيليگي چاغريشديريردي. بو اوزدن ده اينگيلتره توپلومدا يايقينلاشميش و يئتيشميش بير ايدئولوژيني اؤنه چکدي. آلمانلار تورک ميللييتچيليگيني گليشديرمک ايسته ييرديلر، آنجاق تورک ميللييتچيليگي دئيه هئچ بير شئي يوخ ايدي. دئمک ايسته ديگيم بودور کي، تاريخه فرار ائتمکله گونوموزده کي اولايلاري دوغروجا دَيَرلنديره بيلمريک.

ايندي گله ليم سوالين ايکلينجي بؤلومونه. يعني تئهرانداکي تظاهوراتلاردا تورکلرين اؤز پلاکاردلاری ايله چيخماسي مؤوضوعسونا. بو سؤزلري دئينلر ميللي هرکتي سادجه ايره لي یه دوغرو يورومه سي گرکن بير حاديثه کيمي گؤرورلر. اويسا هر زامان ايره لي یه دوغرو يورومک يانليش اولور. بعضن ده درينلييه دوغرو يورومک داها دوغرو اولور. بو حاديثه لرده کناردا قاليب و درينلييه طرف حرکت ائتمه لي یيک. يعني آيدينلانما و ميللي ديلده دوشونوب-يازما تجروبه لريميزي درينلشديرمه لي یيک. هر های-کویه قاتیلماق بیزیم عاقبتیمیز دئیلدیر. بيزيم ميللي پروبلئميميز 2-3 هفته يه چؤزولن بير سورون دئييل. تئهراندا زنگانلي، تبريزلي، اورمولو، تبريزلي کيمليگي ايله چيخماغيميز بيزي آشاغيلار. چونکو: 1. آذربايجان- تورک کيمليگي ميکروکيمليکلره پارچالانار. 2. تئهرانداکي يوزمينلرجه ايزديحامين، باسا- باسين ايچينده بو ميکروکيمليکلرين سسي چوخ سؤنوک گؤرونر. بيز بوندان سونرا 3 ايل اؤنجه کي خورداد اولايلاري نين غورورونو بئله خيردا داورانيشلارلا زده له مه مه لي یيک. 3. تئهرانداکي بو حاديثه نين آرخاسيندا اساسن فارس-ايران ذهنييتي دورور. او ايزديحاما قاتيلان تورکلري بو ايزديحام اؤزو بوغا بيلر. يعني بو اؤلدور-اؤلدور ده اونلار دا تورک کيمليگي ايله اورتايا چيخانلاري اؤلدوررلر. چونکو فارسلارين تورک دوشمنليگي چوخ دريندير. 4. بو حاديثه يه تورک کيمليگيميزله قاريشساق تضادلارين اورتادان قالخماسينا يارديمچي اولا بيلريک. هر ايکي طرف گؤرسه کي، باشقا بير کيمليک، يعني تورک کيمليگي مئيدانا چيخير، او زامان بيزه قارشي تئز بيرلشرلر. بوراخاليم بونلار بير- بيرلريني يئسينلر. بيزيم ياراريميزا جريان ائدن تاريخي اؤز علئيهيميزه دؤنوشدورمه يه ليم. بير تک سؤزله سؤيله يه جک اولورساق، بو ماجرايا قاتيلساق ضررلي چيخاجاغيق. چوخ دا گوجلو اولمايان، آنجاق يوکسليش سورجينی ياشايان ميللي حرکتي بئله ماجرالارين ديشيندا ساخلاماغي باشارماليييق.

سوال: رئژيمين چؤکوش مسئله سيني داها گئنيش آچيدان آنلادارميسينيز؟

جاواب: رئژيمين ايچينده بؤيوک سرمايه لري اللرينده توتان گوجلر وار. بونلار سادجه اللرينده کي سرمايه يه گؤره بير- بيرينه رقيب دئييللر. ايسلام فلسفه سي آچيسيندان دا رقيبلشمیشلر. ديقت ائتسه نيز سئچيم سورجينده ايسلامدا مودئرن هئرمئنوتيکدن يانا اولان عبدوالکريم سوروش «ايصلاحاتچيلار»ي دستکله دي. کلاسسيک هئرمئنوتيکدن يانا اولان، ويلايتي- فقيه دن يانا اولان ميصباح يزدي احمدينژادي دستکله دي. ميصباح يزدي نين ذهنييتيني شورايي نيگهبان و خامنه یي ده پايلاشير. بونلار ذهنييت اولاراق دا پارچالانميشلار. آرتيق بونلاري بير يئره گتيرمک مومکون اولماياجاق. تئهرانداکي حاديثه لر داوام ائدرکن بير چوخ فقيه ده دؤولته اعتيراض ائتدي. خومئيني نين اوزرينده دوردوغو «وحدتي- کلام» اورتادان قالخميشدير. بونلار قارشيميزداکي گونلرده بير- بيرلرينه قارشي چوخ سايقيسيزليق ائده جکلر. پارچالاياجاقلار بير- بيرلريني. سؤز بيرليگي نين داغيلماسي اوزرينه بيرده پايلاشماقدا زورلوق چکديکلري بؤيوک سرمايه لر اکله نير. اونلارين بو باخيشي خاريجي سيياسته ده يانسييير. خامنه يي نين سون چيخيشينداکي غربه قارشي سرت موناسيبته رغمن رفسنجاني جبهه سي غربله ديالوقون طرفداريدير. احمدينژادين يئنيدن سئچيلمه سي و تئهرانداکي اولايلار رئژيمين سادجه داخيلي لئگئتيمليگيني (مشروعیتینی) سوال آلتينا آپارمادي. خاريجي ايماژيني داها دا برباد ائتدي. نئجه کي، بعضي آوروپا اؤلکه لري ايرانا قارشي ائکونوميک اؤنلملر آلديلار. قارشيميزداکي آيلاردا غربله چتين گونلر ياشاياجاق ايران دؤولتي. يعني موطلق گوجو الينده بولوندوران رئژيم سانکي دلي اولموش و اؤزونو محو ائتمکده قرارليدير. چونکو بوتون بو اولايلار نتيجه اعتيباري ايله رئژيمين چؤکوشونه خيدمت ائتمکده دير. آنلاشيلديغي کيمي رئژيمين چؤکوشو گئنيش تاريخي و قلوبال بير سورجده اله آلينماليدير. دوروم بو شکيلده ايسه بيزيم بو قانلي ماجرايا قاتيلماغيميز يارارلي اولماز.

سوال: اورتادا بيزيم بير ليدئر عکسيکليگيميز گؤرونور. بئله بير پروبلئم وارمي؟

جاواب: بيز اولايلارا اؤز کيمليگيميزله قاتيلماق اوچون ميللي ليدئريميز اولماليدير. گؤرورسونوز کي، ايرانداکي ماجرايا قاتيلماق اوچون هر کس بير سؤز سؤيله دي، آنجاق هئچ بير تاثيري اولمادي. چونکو ميللي ليدئرين اؤزونه مخصوص گئنيش ميقياسلي تاثيري اولور. ائله بير شخصييتيميز يوخدور. بلکه ده وار، آنجاق هله اونون مئيدانا چيخماسي اوچون ايجتيماعي شرايط يئتيشمه ميشدي. ليدئرسیز حرکت هئچ بير يئره وارماز. ميلته دار گونده مورال وئرن، اونو روح دوشگونلوگوندن قورويان بير ليدئر اولمالي. توپلومسال ايستکلريميز و ائنئرژيميز اونون تيمثاليندا اؤرنکلنمه ليدير. بئله بير ليدئر اورتادا يوخدورسا، بو مجرايا کيمين رهبرليگينده قاتيلماليييق؟ ايجتيماعي- سياسي حرکتلر چوخ آمانسيز اولور. ائنئرژيني باشقاسينا قاپديرماماليسان.

سوال: او زامان بيز کناردان تاماشاچي کيميمي باخماليييق؟

بعضن تاماشاچي اولماقدان ياخشي شئي يوخدور. چونکو هر ايکي طرفين عکسيکليکلريني گؤرمک اولور. مثلن ايکي نفر شاهمات اويناياندا کناردان آرخايينجا باخان آدام هر ايکي طرفين قوصورلاريني گؤروب و گولور. بيز ده کناردان باخماليييق. آنجاق بونون ياني سيرا رئژيمين سقوطا اوغراييشيني سئير ائده رک فيکري- سياسي پلاندا حاضيرلانماليييق. کادرلاريميز اولمالي صاباحکي بؤيوک ايشلر اوچون. تئهراندا اؤلن اينسانلار اوچون بيز ده اينسان هاقلاري اؤرگوتلري کيمي تأسوفلنديگيميزي بيلديرمه لي یيک. چونکو بو اؤلنلر بيزيم قورتولوشوموز يولوندا اؤلمورلر. حيسسيياتا قاپيلماغا گرک يوخ، بيز بير داها يانليش ائتسک، آرتيق تاريخدن سيلينه جه یيک. چونکو چوخ سورعتله فارسلاشيريق. بيزيم شهيدلريميز آيري اولماليدير. ايراندا دئموکراسی يولوندا بير تک آدام فدا ائتمه مه لي یيک. تاريخين گتيريلري بلکه بير آز گئج اولا بيلر، آنجاق اولسون. بيز يالنيز کيمليک ساواشي آپارماليييق. دئموکراسی بیتمه ین بیر سورجدیر. میللی مسئله بیر فرصتدیر. بو کيمليک ساواشيني هله ليک آيدينلانما و کيمليکلنمه يولوندا سوردوروروک، زامانيندا بونون بؤيوک گؤستريلريني ده گؤره جه یيک. من اؤزومو نه احمدينژادلا وطنداش سانيرام، نه ده موسوي ايله. وطنداشلیق یالنیزجا حقوقی قاورام دئییلدیر، هم ده اخلاقی و کیملیکیا بیر فاورامدیر. نئجه کی، اینسان اؤز وطنداشلیغینی حقوقی باخیمدان دَییشدیره بیلیر. آنجاق اونون ائتنیک کیملیگی اوزون وعده لی آسیمیلاسیون پولیتیکاسی ایله دَییشیر. نئچه نسل بونون اوچون محو اولمالیدیر. میایونلارجا تورکون ایراندا فارسلاشدیغی کیمی. ساواشلار يالنيز سيلاحلارلا ياپيلمير. يالنيز کوچه لرده اؤزونو بوشونا اؤلومه وئرمکله اولمور. روحن و بئيين اولاراق دا ساواشلارا حاضير اولماق لازيمدير. بيز تاريخ بویو فيکرن مغلوب اولموشوق. تاريخ بويو فيکرن مغلوب اولدوغوموزو يئني- يئني آنلاماغا باشلاميشکن، يئنيدن فيکير مغلوبييتينه اوغراماماليييق. گوج، قوراللاری قويان اينسانلارا خيدمت ائدر. ايندي او قوراللاری قويان اينسانلار بير- بيريني يئمه يه باشلاميش. بو اوزدن ده موطلق گوجون چؤکوش زاماني گلميشدير. تلسمه يه گرک يوخدور.

‏2009‏/06‏/22

 ================================

بو  اکی  جوان اذربایجان ترکیدی  که تهراندا  یاشیدیلار  

رژیمن  داخلی سواشی نتیجسینده جانارین الدن وردلر 

٣٠خرداد ١٣٨٨در تهران ندا آقا سلطانی  به کدامین گناه کشته شده